ពិសេសណាស់! អាជ្ញាធរជាតិអប្សរាកំពុងដំណើរការដាំស្មៅនៅមុខប្រាសាទអង្គរវត្ត

70


ខេត្តសៀមរាប ៖ ក្រុមការងាររបស់នាយកដ្ឋានទ្រទ្រង់បច្ចេកទេសនិងគម្រោងអន្ដរវិស័យនៃអាជ្ញាធរជាតិអប្សរា បានឈូសឆាយដីរៀបចំដាំស្មៅនៅទីតាំងអតីតចំណតរថយន្តបណ្តោះអាសន្នមុខប្រាសាទអង្គរវត្តក្នុងគោលបំណងបង្កើនទេសភាពបៃតងនិងសោភ័ណភាពស្រស់បំព្រងនៅជុំវិញបរិវេណប្រាសាទក្នុងតំបន់រមណីយដ្ឋានអង្គរ។

តាមផែនការនៃគម្រោងការរៀបចំនាពេលនេះ គឺមានទាំងការដាំស្មៅនិងប្រភេទដើមឈើដើម្បីលម្អបរិវេណនោះផងដែរ ក្នុងនោះនឹងមានការដាំស្មៅចំនួន៩ពាន់ម៉ែត្រការ៉េ ដាំដើមក្រវ៉ាន់ព័ទ្ធជុំវិញ៣០០ដើម និងឈើធ្នង់៦០ដើម។ សូមបញ្ជាក់ថា ទីតាំងអតីតចំណតបណ្ដោះអាសន្នមុខប្រាសាទអង្គរវត្តត្រូវបានបញ្ឈប់នូវប្រតិបត្តិការចាប់ពីថ្ងៃទី១ ខែសីហា ឆ្នាំ២០១៩ ដោយតម្រូវឱ្យយានជំនិះគ្រប់ប្រភេទចូលចតក្នុងចំណតរៀបចំរួចរាល់ដែលស្ថិតនៅផ្នែកខាងត្បូងឈៀងខាងលិច និងចំងាយប្រមាណ២០០ម៉ែត្រពីទីតាំងចាស់៕

ប្រភព ៖ មន្ទីរទេសចរណ៍ខេត្តសៀមរាប