កញ្ញា ប៊ី សុធារី នឹង​ក្លាយជា​តំណាង​កម្ពុជា​សម្រាប់កម្ម​វិធី​ Miss Charm International 2020​

220


ភ្នំពេញៈ​ គ្រាន់​តែបញ្ចប់កុង​ត្រា​ជា​មួយ​នឹង​ក្រុមហ៊ុន Arise Agency ភ្លាម អតីត​កញ្ញឯក​ចក្កវាឡ​កម្ពុជា​ឆ្នាំ​២០១៧ កញ្ញា ប៊ី សុធារី ក៏​ក្តោប​បាន​ឱកាស​ថ្មី​ភ្លែត​គឺ​ក្លាយជា​តំណាង​កម្ពុជា​នៅ​ក្នុង​កម្ម​វិធី​ប្រកួត Miss Charm International 2020 នៅ​ប្រទេស​វៀតណាម​ ដើម​ខែ​មករា និង​ដើម​ឆ្នាំ​២០២០ ខាង​មុខ​នេះ​តែម្តង​។

គេ​អាច​និយា​បាន​ថា ណេះគឺ​ជាការកត់សម្គាល់ថ្មី​មួយ​ទៀត​សម្រាប់​កម្មវិធី Miss Charm International ដែលជា​ការប្រកួតបវរកញ្ញាលំដាប់ពិភពលោក​ ដែល​នឹង​ត្រូវ​ធ្វើ​ឡើង​លើកដំបូង​ក្នុង​ឆ្នាំ២០២០ ​ហើយ​កញ្ញា ប៊ី សុធារី ក៏​នឹង​ក្លាយជានារីខ្មែរ​ដំបូង ដែល​បាន​ចូល​រួម​ប្រកួត​ក្នុង​កម្ម​វិធីនេះផ​ងដែរ។ ដំណឹង​នេះ​ត្រូវ​បាន​កញ្ញា ប៊ី សុធារី ឲ្យដឹងហ្វេសប៊ុកថា៖ «ជំរាបសួរពុកម៉ែ បងប្អូន អ្នកគាំទ្រ ព្រម​ទាំងប្រជាជន កម្ពុជាទាំងអស់គ្នា ក្នុងឱកាសថ្ងៃនេះផងដែរ នាងខ្ញុំ ប៊ី សុធារី សូម​ជម្រាប​ជូនព័ត៌​មានទៅកាន់ ពុកម៉ែ បងប្អូន និងអ្នកគាំទ្រទាំងអស់គ្នាឲ្យបានដឹងថា នាងខ្ញុំនឹងក្លាយជា Miss Charm Cambodia ដំបូងដែលនឹងត្រូវ តំណាង​ឲ្យ​​កម្ពុជា ចូល​រួម​ប្រកួត​​នៅ​ក្នុង​កម្មវិធី Miss Charm International 2020 ដែលនេះគឺជាឆ្នាំដំបូងនៃកម្មវិធី Miss Charm International ផងដែរ»។​ កញ្ញា បន្តថា៖ «ហើយកម្មវិធី​នឹង​ប្រារព្ធ​ធ្វើឡើង​នៅ​ក្នុង​ប្រទេស​​វៀត​ណាម​ នៅ​ចាប់​ថ្ងៃ​ទី​៣ ដល់​ទី​១៦ ​ខែមករា ឆ្នាំ​២០២០ ​ខាងមុខនេះ។ ដូច្នេះ​សូម​ពុក​​ម៉ែ បងប្អូន អ្នក​គាំទ្រ និងប្រជាជនកម្ពុជាទាំងអស់ មេត្តា​កុំភ្លេចតាមដាន និងជួយគាំទ្រដល់ រូប​​​នាងខ្ញុំផង ព្រោះ​​អ្នក​ទាំង​អស់​គ្នា​គឺ​ជា​កំលាំង​ចិត្ត​ដ៏​ធំ​មួយ​ស​ម្រាប់​រូបនាងខ្ញុំ ដើម្បីចូលរួម​ប្រកួត​​កម្មវិធី មួយ​នេះ។ សូមអរគុណ»។

គួររំឮក​ដែរ​ថា កញ្ញា ប៊ី សុធារី គឺជាអតីតបវរកញ្ញាចក្ក​វាឡ​កម្ពុជា​ឆ្នាំ២០១៧ ថ្មីៗនេះ​នាងបាន​ប្រកាស​ជាសាធារណៈថា បានបញ្ចប់កុងត្រាជាមួយក្រុមហ៊ុន Arise Agency ហើយ ដោយ​សារ​​តែមានភាពចម្រូងចម្រាសមួយចំនួន ពោលគឺ​ក្រុមហ៊ុន​ធ្វើខុស​លក្ខខណ្ឌមួ​យ​ចំនួន​ក្នុង​កុងត្រា ​ដែលធ្វើឲ្យនាងមិនអាចទទួលយកបាន៕